名寶石餐廳

Open Now

Now Closed

經常經過門口， 都高朋滿座。 今日專登入去試下 ，好彩今日有位。呢度嘅湯好特別， 無論係忌廉湯定係羅宋湯 ，都好濃好多料， 唔同出面水汪汪。 個羅宋湯裏面仲有好多菜好好味。 雖然餐包只係一般嘉頓貨色， 但都熱辣辣嘅濃湯特別開胃。牛柳拼大蝦份量唔係太大啱啱好。 本來要咗五成熟，但係呢度係七成 。好彩牛柳本身都好淋， 冇食柴皮嘅感覺。 蝦肉都幾實幾甜，雖然肯定係雪藏蝦，但係都交足功課。烚豬手嗰份量就大咗啲，如果一個人食有啲吃力，兩個人又似乎唔夠。 但其實個豬手都唔錯 ，唔係太鹹， 啲肉都幾彈牙。 不過唔明點解跟個泰式酸甜汁， 不倫不類。可惜餐廳啲位太迫， 隔離位講乜都聽到，差唔多以為係識嘅咁。 樓底又矮 ，形成個環境好嘈雜 ，想坐多陣傾下計都唔得。