開飯主義

Open Now

Now Closed

大埔墟近公園仔附近有一間餐廳，平時都見好多人等位，今次就入去試吓晚餐。餐廳燈光耀目，而且招牌大大隻字寫住開飯主羨，容易搵到之餘，而且入面座位非常舒適，更有卡位選擇。店員隨即比左餐牌我哋選擇，餐牌中嘅食物非常吸引，而且圖文並茂。首先就叫咗幾款小食，分別係法式燒蠔、蒜香蜜糖雞翼、韓式炸雞翼、煎餃子、小丸子同埋蒜燒茄子等。燒蠔中，有芝士同埋蒜蓉味道選擇，即叫即整新鮮出爐，生蠔有我手板咁大隻，而且非常香，特別係蒜蓉味嘅燒蠔，食落去除咗味道Creamy新鮮之外，亦好滋味。煎餃子一份有四隻，外皮煎得非常香脆可口，而且皮薄餡靚，每一啖都係新鮮嘅豬肉味道。同樣地鍾意食蒜蓉嘅我，蒜香茄子面頭鋪滿厚厚嘅蒜蓉粒同埋蔥花粒，食落去茄子質感好林，非常入味。主菜方面，分別叫咗肉醬雞扒焗意粉同埋忌廉汁軟殼蟹焗海鮮飯，兩款賣相非常吸引。飲品方面，叫咗凍檸茶同埋熱柚子蜜，凍檸茶茶味香濃，而且好大杯，好抵飲。總括而言，餐廳食物款式多選擇，屬於平民化嘅餐廳，主要以焗飯、焗意粉為主，食物味道新鮮美味，仲要係即叫即整，難怪經常滿座，門口多人等位。