紅蔥頭 (Closed)

平時同另一半都會成日中午去到鑽石山荷里活廣場食lunch，有時一個月去幾次，依排個大食代仲裝修緊， 令到本來已經小食肆選擇嘅商場變得少上加少。今日行開見到紅蔥頭原來平時都有做開優惠，中午12點前埋單就免加一。記得上一次食紅蔥頭已經係五，六年前喺荃灣食。所以見咁耐冇食過咁就入去試吓，兩個人叫咗一個蘆筍野菌忌廉意大利飯同一個西式牛扒午餐。等左一陣，侍應已經開始將啲食物送到。個蘆筍忌廉意大利飯望落去同餐牌張相有少許出入，賣相冇咁吸引。意大利飯食落去冇乜菇味，成個意大利飯都係會比忌廉味蓋過晒。另外就係個牛扒餐，味道不過不失，牛扒幾大塊冇偷工減料，呢個價錢都算係咁。而餐廳環境都好舒服整潔，燈光偏暗，幾適合喺度傾吓計坐下，不過餐廳嘅入口就要離開商場啊出返去馬莎旁邊先入到。