樂天經典 (Closed)

之前去“樂天皇朝”食過七色小籠包，食物同環境皆有質素，同一集團響加拿芬廣場二樓開設左另一間叫“樂天經典”，佢哋以新加坡菜式為主，有胡椒蟹、叻沙等美食為主。而且如果透過openrice訂位，午餐可享有68折優惠，非常抵食。首先點左每人一件招牌扣肉包，肥大肉厚既扣肉炆煮得又淋又入味，用熱辣辣蒸好既面包包住扣肉，中和左肉既肥膩，大啖大啖咬落去非常好味，每人一件剛剛好。跟住離一個鐵板豆腐，鐵板上碟保持熱度，豆腐配上類似魚香茄子既醬汁，帶點微辣非常惹味，而鐵板面有一層蛋做底，增加左餸菜既層次感，豆腐又滑，用離配合白飯一流。而細既蒜香排骨一碟有六件，每件都又厚又大舊，雖然十分厚，但肉質仍能保持鬆軟，而香蒜加上炸排骨，香口又好味。再加一碗海鮮叻沙米線，叻沙湯底又香又濃，材料有蟹柳等，十分好味，成碗連湯清曬。小食黃金炸魚皮係必食之選，每一塊炸魚皮片沾上蛋黃，魚皮又香又脆，配上咸蛋黃十分滋味。最後每人一碗糖水，楊枝金露柚子帶酸，芒果帶甜，而糖水質感夠濃厚，另外椰子西米露湯丸，香濃椰子香味，加兩粒芝麻湯丸，大滿足。餐廳裝修有格調，卡位坐得舒服，而家職員服務態度非常好，“樂天”果然係有水準。