Season Oyster & Wine Bar (Closed)

間餐廳係內街有啲難搵，搵左一輪先搵到。餐廳有兩層，我同朋友被安排坐上層。上層樓底矮，周圍既傾偈聲困住晒，好嘈。而且冷氣啲風好勁，吹到正，之後叫左侍應較一較個冷氣葉。張櫈係鐵櫈，坐得唔係太舒服。每張枱都有一個按鐘，方便顧客點餐，但㩒左等左陣係冇人黎既。所以咁啱有侍應上左黎，就要把握機會叫住佢啦！諗住叫燒海膽芝士多士，點知侍應話焗爐壞左，所有焗野都冇。最後點左白酒生蠔套餐、牛肝菌意大利飯、日式醬煮魷魚筒。等左半個鐘，咩都未黎。咁催一催叫佢上住杯酒先啦同順便加日本一口和牛粒。之後都等左十分鐘先上杯酒。牛肝菌意大利飯，味道係ok既，但唔夠熱日式醬煮魷魚筒，味道唔錯，可惜又係唔夠熱食完個兩味，生蠔都未到，又追一追。等左一陣就送黎啦，懷疑佢係漏左單。本應係第一度菜，變左最尾，無奈。生蠔其實幾肥美幾鮮既。其間隔離枱覺得凍又去較個冷氣葉，啲風又吹返落我地度，唉好凍。一口牛等左好耐都未黎，已經追左兩次。第三次同佢講如果未整就取消。過左一輪，侍應話已經幫我地取消左。哦，好，咁凍都唔想再等，唔食都罷。食物係可以，但環境同服務都唔掂，應該冇下次。