王林記潮州魚蛋粉麵

Open Now

Now Closed

嗰日放工未食晚餐，同兩個同事入去呢間麵餔食野。入到去，個阿姐速速埋嚟，乜d服務咁好嘅？原來係埋嚟提醒我地重有五分鐘就八點，last order叫我地速速叫野食。吓，八點就last order, 早左d喎。入面d座位只屬基本嘢，唔預d客坐得耐。粥麵店都係咁喇，d客唔會太多要求。早餐牌唔啱睇囉，夜市囉。呢張就啱，速速睇，速速叫，怕d阿姐喺旁邊用隻眼射住。我兩個老友叫左魚蛋麵同埋魚蛋魚片麵，點知嚟左一碗魚片麵同埋一碗魚蛋麵。雙併加八蚊個喎，唔好攪錯喎。講俾個阿姐知，佢至攞番d魚片嚟，可能係趕住收工攪錯左掛。講番d味道，咁就0K嘅，魚蛋魚片都幾彈牙，調味都唔錯，話晒呢間野係以魚蛋作頭號推介，麵都幾有咬口，煮麵d時間控制都算合適嘅。呢碟撈粗麵泡制都合格嘅，重有d通菜伴碟，算食得過咁喇。呢碟腐乳通菜，屬於大路貨咁喇，好難有乜亮點喇，偏咸就一定喇，食完就一定要揾番d野飲，唔係會好口渴囉。我就肚餓左d，叫左碟牛腩飯食。牛腩調味都唔錯，唔算靭嘅，咬幾下就吞得落，冇乜渣。整體嚟講，呢間麵店嘅出品算係ok, 但趕住收工衍生嘅問題，令我地唔太高興囉，呢d服務要改善吓喇。