老夫子餐館 (Closed)

今次嚟到一間以老夫子做主題既餐廳，上次新開張經過太多人等排到地下門口未有機會食，今次唔使廿張飛應該好快呱，點知都等咗個半鐘，好在等待中途買咗盒老夫子拼圖，仲送兩本老夫子漫畫可以比細路消磨吓時間。如果門口放多幾張櫈比人坐住等會更好，好在門口登記個位小姐笑容滿面態度又好好咁講唔好意思，咁先消消等得耐既氣咋。入到去環境唔錯，到處可見老夫子既畫，連洗手間都有，餐牌亦都係老夫子個樣。每款食物都好似老夫子四格漫畫啲名咁，雖然幾得意，不過一時間都睇到有啲亂。等侯食物時間有點耐，唔怪得要等咁耐先有位。終於等到食物嚟到，裝食物既器皿都好靚仲有老夫子圖案，估唔到食物水準味道唔錯，份糧都足夠，比好多主題餐廳好得多，賣相亦很好,放上網呃like一流。成餐飯都食得好滿意，由於我地只得二大一小叫唔到太多款式，下次一定要再嚟過試埋其他款既食物。