Hello Kitty Secret Garden (Closed)

作為Kitty迷既我，周不時都會去唔同國家既Kitty Cafe, 為既係同Kitty影相，對佢地既食物一直都冇expectation, 因為通常都係得個樣。但今次去呢間Kitty secret garden俾到驚喜我，佢地既食物質素唔差，唔係得個樣！我同朋友點左個和牛漢堡拼炸蝦、拿破崙意粉、吞拿魚三文治、熱朱古力同Rose Latte。先講個和牛漢堡拼炸蝦先，個漢堡用料唔錯，肉汁濃郁，個炸蝦都好新鮮。而拿破崙意粉味道都唔錯，但配料太少，只得腸仔。令我有驚喜既反而係個三明治，佢焗到好脆，而且吞拿魚份量多，好味！而佢既Rose Latte, 好重花香味，同咖啡味好襯，值得一讚！但杯熱朱古力就淡左d，唔夠濃。溫馨提示：各位Kitty 迷如果唔想破壞咖啡上既Kitty拉花，可以好似我咁，用枝熱飲飲管飲底下既咖啡，咁就可能將拉花圖案保持到最後。