ADD+ (Closed)

之前幾次去西九都係想免費參觀吓M+博物館，早排知道M+底層新開咗間餐廳，地方幾大咁就想試試。雖然座位係多，但假日去都難免要排隊等吓，好在條隊郁動都快。入座時已經對衛生大打折扣，餐廳大部分選用米白色座墊，但幾乎每一個位都有明顯同大量污漬，未坐低已經有啲反胃。裝潢方面似酒店餐廳多過西餐廳，感覺餐廳想營造出好啱打卡嘅氛圍，但設計上係完全失敗。煲仔沙嗲牛肉炒腸粉 $148呢款炒腸粉做得唔錯，熱辣辣之餘有沙嗲應有嘅鹹香，可惜唔太夠辣，份量亦略嫌有啲少。卡邦尼薄餅 $198薄餅主要食材有巴馬臣芝士、煙肉同忌廉等，餡料真係同卡邦尼意粉無異，但味道有少少淡，唔夠香濃。但最欣賞反而係餅皮，焗得異常焦脆，比餡料更吸引。 紐約奶昔 $88以花生醬、雲呢拿雪糕、煙肉、香蕉同迷你棉花糖製成嘅美式奶昔，配方上都令人聯想起石峽尾嘅No milkshake no life，但味道上係遠遠不及NMNL招牌煙肉花生醬奶昔。ADD+嘅煙肉粒味道過重，花生醬香氣完全蓋唔過煙肉嘅油益味，令成杯飲品變調，質感相當奇怪。