素食一家 (Closed)

素食一家今日午餐清清地去食素調理下身體叫左幾款不同菜式試一試，先黎個開胃小菜，涼拌海蜇手撕雞。呢個小食非常野味，呢個“海蜇”唔似真，不過都好滑好彈牙，而個雞絲唔講你食落都唔知係素，辣辣地好開胃。然後呢個係是日例湯，就咁睇都足料，飲落個湯好甜，唔覺有味精。跟住就試呢個菠蘿咕嚕肉，個汁較得啱啱好，唔會太酸，亦唔會大甜；三包椒好爽脆，好有新鮮蔬果味；而戲肉係個“咕嚕肉”，非常之推薦食呢樣餸，個皮脆脆地，裏面軟淋淋但又有咬口，配埋個汁冇得輸，做得好過好多“堅”既咕嚕肉。再黎就呢個籠仔梅菜蒸茄子，呢樣係最清淡既一樣餸，但亦相當唔錯，因為個茄子蒸出黎好多汁喺裏面，好鮮甜既味道，加上有D梅菜同薑粒豐富個味道，但又搶走茄子淡淡既鮮味，唔錯！最後係呢個黑松露松子炒飯，就咁睇賣相都好靚，D飯炒到一粒粒，好乾身唔會油淋淋；另外黑松露既香味，無論嗅覺同味覺都好享受，令你好想食完再食。總括而言，我好中意呢間素食餐廳，食物味道好，質數好高，值得推薦！