尚八日式燒肉店 (Closed)

今次去食尚八食午市燒肉放題。原本想星期一至四去平啲（$108），但就唔到時間，就畀多$30星期六食啦！我哋前一日用電話book咗12點，去到佢哋都只係啱啱開舖。店員帶我哋一行四人去卡位坐，再問我哋揀咩餐，目標明確嘅我哋當然揀$138午市任食套餐。 套餐包咗兩碟頭盤，入面有牛肋骨、牛柳粒、牛舌、蠔、蝦等等。放題食材就主要係唔同調味嘅豬肉同雞肉 ，另外仲有蔬菜同少量海鮮。頭盤嘅牛肉果然係正啲，好腍好juicy！啲蝦同青口都好大隻，不過蝦要小心啲燒，如果唔係好易燶。 啲廣島蠔用咗好多油浸住嚟燒，食唔係好出個蠔本身嘅味，有啲失色。豬腩肉有分厚切同薄切，因為個肉好多肥膏，所以厚切就相對油膩，但如果燒耐啲就會好脆卜卜。薄切就似豬肉片，快啲熟。雞肉同雞翼就容易燒好多，雞翼仲好細心咁切成單骨，方便食。雞腎燒完都唔會韌，好食！不過食太多肉始終都要清下個胃，所以魷魚筒、鯖魚、菠蘿同甜蕃薯就啱啱好可以清清個胃。嘢飲方面都有ok多款，可樂、七喜、石榴汁同芒果汁等等，仲可以搵店員攞熱茶！店員服務態度都幾好，主動幫我哋換網，嘢食都送得幾快，同埋無話夠鐘就趕人走。$138一個人真係超值，認真推介！