匠伊兵衛 (Closed)

啱啱去完韓國旅行返嚟第二日，就同朋友嚟呢度食嘞！可能韓式嘢唔多啱我口味，所以呢餐特別好味~第一次嚟iSquare樓上食店就奉獻咗俾呢間，由於訂咗檯仲有海景添！是日星期六下午，不過入座率唔夠一半，靜靜地、坐得舒服。服務員亦好好禮貌，主動定時加茶。。我哋有嘢問，有個新嚟做嘅亦好老實咁講自己唔知，然後即刻搵過個嚟解答。三個人三個Set Lunch：一個好似係是日精選嘅定食、一個牛肉鍋、我就吉列豬扒定食。因為其餘兩個唔係我食，公平起見我係唔會講嘅，而我個定食就真係好正！就係咁樣：例牌嘅自磨芝麻、有個前菜小食、麵豉湯、燉蛋，同埋，就係吉列豬扒同飯啦。小食同麵豉湯都係一般中高檔日本嘢嘅水準，燉蛋就冇乜味咁解。。芝麻磨嗰時亦都唔覺佢香。。之但係個豬扒就正喇，個皮做得好鬆脆、唔油膩，豬扒唔肥唔會咬到有舊肥糕咁樣，又唔鞋，冇筋唔痴牙，食晒亦冇界口嘅感覺﹙我覺得比起某專門店更好﹚只可惜個菜絲沙律係冇沙律汁嘅，亦都冇得Re-fill。。。另外朋友食嘅定食：﹙由於俾咗部相機朋友玩，所以影佢份嘢仲多，而且原來係冇影到個牛肉鍋添。。﹚