天海 (Closed)

唔知點解一直對天婦羅都冇咩好感，今日lunch朋友話想去呢間試吓，我本身都冇抱有太大嘅期望。.因為餐廳比較細嘅關係，建議大家食lunch嘅話記住要12點前到，咁樣就可以唔使等位，夏天熱辣辣喺室外等位真係搞唔掂。.記得果籽之前好似介紹過呢間餐廳，係介紹食海鮮天丼，所以坐低嘅時候我諗都冇諗就決定叫佢。.一嗌完嘢食，佢就會即刻比杯綠茶，仲有個前菜。主角終於到啦，海鮮天丼，即叫即炸。一開始見到覺得份量好似有啲細會唔會唔夠飽㗎。印象中佢有炸魚、炸魷魚、炸蝦、炸帶子、炸四季豆同埋炸蛋。我最鍾意就係篤穿個炸蛋、用蛋黃撈飯。因為佢本身就已經加咗醬汁喺天婦羅上面，所以唔需要額外點汁。呢個天婦羅不得了，咬落脆口，同埋個汁調得啱啱好，海鮮又好新鮮，呢個配搭我比一百分，最後我仲食唔晒啲飯添。