囍源古早蛋糕 (Closed)

兩星期前發現呢間囍源古早蛋糕，買咗三件唔同口味嘅古早蛋糕同同事分享之後，大家都念念不忘，因為佢真正做到黃金邊黃金底，而且低糖少油，我就覺得好適合屋企嘅老人家同小朋友食，於是今日又拉大隊嚟買其他唔同嘅口味返去試！是日口味不能盡錄，真係有好多選擇，店主話星期五同週末會推出較多口味，所以又要一輪內心嘅掙扎，因為款款都咁吸引！老闆特別推介呢個芋泥味，話最近改良咗自家製芋泥餡嘅配方，芋泥係用泰國芋頭打蓉而成，所以特別香同滑。既然屋企人又鍾意食香芋味食品，所以決定試吓呢個改良版芋泥古早蛋糕。芋泥餡帶有光澤，目測已經睇得出特別滑，而且仲有流心嘅效果，芋泥餡嘅厚度成一厘米咁厚，輕輕一壓啲餡就爆曬出嚟，不得了呀😱果然食落真係好滑口，配合古早蛋糕嘅蛋香，真係好驚喜好高質呀！髒髒朱古力面層灑上大量朱古力粉，中間一層朱古力夾心，令到整個蛋糕充滿濃郁嘅朱古力味之餘又仍然做到少甜嘅效果，真係啱晒屋企嘅小蝗蟲！我比佢哋清潔雙手之後就直接用手拎嚟食，因為蛋糕面灑上大量嘅朱古力粉，所以蛋糕好食之餘連隻手指都一樣咁好食🤣，食到最後一定要啜埋手指先叫圓滿！而我就好鍾意呢個紅豆蓉古早蛋糕，啲紅豆蓉餡真係爆曬出嚟！囍源嘅自家製