花滿樓京川滬菜 (Closed)

我地陪阿媽買完衫，記得上次黎食過雲吞雞好味，一於帶媽咪黎試下！ 小籠包 - 上次食過蟹粉小籠包既蟹粉一般，今次小籠包反而幾好，皮薄肉稔，夠湯汁！醉雞 - 嫩滑，酒味香濃，不錯的冷盤。雲吞雞 - 白白既雞湯鮮甜，飲得出金華火腿，雲吞皮薄而滑，算係必食。配上小棠菜同埋仲幾滑既雞肶肉。擔擔麵 - 人手拉麵彈牙，麻醬湯底濃味，有花生蝦米粒，幾好。水煮魚 - 魚片唔多，加上葱椒芽菜。沒有麻，只有中辣，很多地方都煮得比它出色。酒釀丸子 - 桂花算香，但唔夠熱，丸子煮耐左。 有甜品杞子糕送，但太甜所以無乜食到。今次唔會人多，靜靜地，三位坐卡位闊落幾好，阿媽滿意。