水門雞飯 (百宜樓) (Closed)

好有泰式小檔風味既餐廳， 店內既銀色枱面同埋裝修真係似足泰國既感覺，第一次係香港見到呢類型既小店， 感覺好舒服因為乾淨。店面唔算太大但正正方方都幾闊落，一入門口見到廚房一排排海南雞啩係度， 二話不說已經決定要食海南雞飯， 雞飯簡約唔花巧， 海南雞好滑， 油飯好夠味但唔油膩， 跟飯仲有胡椒冬瓜湯，配埋個好大份既泰式炒通菜，完全係去左泰國咁。除咗雞飯仲有好多款食物同飲品， 洛神花茶值得推介， 酸酸甜甜咁， 食完雞飯比較重味既野清清味蕾非常不錯。