九井壽司 (Closed)

之前見到呢一間九正壽司嘅廣告已經好想試吓，因為我好鐘意食壽司，而呢一間唔係常見大型嘅連鎖店，覺得可能會有驚喜！今次嚟九龍灣行完傢俬店終於有機會嚟試吓😋我哋大概晚上8:00去到，當日係平日，都有啲人食下，有啲家庭帶埋小朋友嚟食。店員好好人，帶咗我哋去坐卡位。每桌都有平板電腦自助點餐，上菜嘅形式就係用輸送帶送到桌前。每次叫完嘢食都會可以抽獎一次，好得意！好似去咗日本食壽司咁😆然後真係會中獎㗎！我哋點左四次有兩次中獎，禮物就係一盒果汁同埋一支益力，好開心，小朋友嚟一定好鍾意！壽司方面都唔錯，價錢又唔貴，款式都算多，而且材料新鮮。我哋都叫咗啲小食，少見啲嘅就係有呢個雞泡魚乾，都係30幾蚊，好抵食，而且點沙律醬好好味。下次食壽司唔一定係大型連鎖店，可以嚟下呢一間係經濟實惠之選，而且環境乾淨，店內裝修同氣氛都好似身處日本咁。