神燈燒 (Closed)

神燈燒呢間餐廳位於油麻地，交通非常方便，地鐵站一出行幾分鐘就到，門口有大大隻燈神隻手轉轉下咁叫你入去，喜感十足。入到去餐廳裝修係有多少童話故事感覺，加埋不停播埋主打既主題曲，令你真係覺得係有燈神會出現架。卡位位置寬敞，唔會好緊迫。地方乾淨清潔，比起其他燒肉場，我覺得算係唔錯喇。放題套餐我揀左Level 2，我自己覺得選擇已經足夠晒，唔洗燈神出現其實已經滿足我既願望。烤肉有好多款選擇，已經調味既或者要自己落調味料既肉料都齊備，我呢D牛魔王一定先燒先食牛肉，你會發現D牛肉真係靚牛肉，有雪花紋又有牛味，係令人有驚喜既。另外，燒肉既同時亦唔好錯過刺身同壽司呢D選擇，因為壽司質素真係唔差，而刺身亦非常鮮甜好味，比好多任食場都出色。除此之外，仲有點心，熟食，天婦羅，餃子等等呢D小食，其實我自己黎講全部都好吸引，我自己每樣掂下已經飽，round 2 都堅持唔到，建議大家作好準備先黎大戰一場。食唔到咁多都唔緊要，飲多D野都可以回下本，佢D特色飲品又真係好鬼正，除左雪櫃自己隨便攞野飲之外，仲有咸檸7，大檸樂，黑牛冰呢D野飲，真係幾出色架。整體我係滿意既，加上價錢合理，我認為值得一試。