旺記冰室 (大本型) (Closed)

今日帶埋小朋友去油塘大本型行街，行到攰攰哋去咗3樓大食代食飯， 入面有好多餐廳 ， 今次我就試咗最近門口嘅 “旺記冰室”。喺門口見到佢哋嘅餐牌,都幾啱我哋食。重要標明《即叫即做，請耐心等候！》感覺已經好正，可惜人唔多，唔可以order太多嘢食, 如果唔係就會食唔曬。我哋去嗰時段係lunch時間，見佢個餐牌零零舍舍有一樣叫做每日特製飯餐， 咁講通常都係等於廚師推介。 既然係推介一定好食，今日特製飯餐係《秘製三蔥豉油雞扒飯》。 我就叫咗一個加多一杯凍 奶茶 少甜少冰。其實都唔係等好耐，好快就已經到餐。見到嘅時候，我覺得超正，因為平時出街食嘅雞扒飯，塊扒勁細塊，但佢哋嘅雞扒係可以遮住個飯😙 仲有跟飯居然係沙律菜， 諗都諗唔到。 之後想講嘅係佢嘅三蔥豉油，真係好香， 好似蔥油飯但係佢嘅油就變咗豉油。 雞扒除咗大塊仲要係厚切，咁嘅價錢絕對超值。 我都未走已經聽到廚房話賣曬😂 食好嘢係要趁早。