鈴夏食堂 (Closed)

呢間日式小店最近喺網上都幾多人討論，所以今日專登去試下睇下掂唔掂。 店裡面只有好少座位，我諗都係十幾個位左右。平日嘅夜晚7 點左右，唔洗等位可以直接入座。呢度嘅款式唔係好多，有飯、烏冬、薯餅同埋飲品。一向我都覺得餐廳如果野食做得好，唔需要有太多花款，反而應該係要貴精不貴多。今次叫左一個牛肉飯同埋一個蕃茄牛肉烏冬，另外再加多一個北海道芝士薯餅。先上左個牛肉飯先，佢個汁唔太濃，加埋隻溫泉蛋撈埋一齊食，個飯變得好滑，成個飯嘅感覺清清地，我覺得唔錯wor！個蕃茄牛肉湯烏冬要等比較耐，一上枱好熱。除左蕃茄同牛肉之外，個烏冬上面仲加左d 芝士粉。對比之下，蕃茄湯嘅味道較濃味，個烏冬都幾彈牙，唔錯啊！牛肉佢就唔算有太多，不過蕃茄又真係唔少wor，個味道幾開胃，呢個都唔錯。芝士薯餅最怕就係好油淋淋，呢個薯餅完全無呢個情況出現，芝士味亦唔算係太濃。呢間店面嘅設計令到食客可以一邊食一邊睇到廚房入面個廚師煮野食嘅情況。侍應亦都會主動加茶，成間舖得2個人，但係做野都好快！值得支持下啊！