Mimila (Closed)

要喺沙田新城市廣場覓食實在有啲難度，因為超多連鎖店，值得支持嘅良心小店就非常少，其中一間係七樓嘅星馬餐廳 Mimila。我叫咗碗特濃蝦湯喇沙摻摻，配料除咗 menu 寫嘅海蝦同越南扎肉外，仲有魚片，豆卜同芽菜。我覺得呢碗麵嘅取分之處係配料，尤其係扎肉同魚片，又厚切又好食，吸汁嘅豆卜亦頗滋味，反而個湯底略嫌稀咗啲，蝦味唔夠濃，喇沙嘅椰汁味亦欠奉，同「特濃」仲有啲距離。對面位叫咗新加坡白胡椒肉骨茶，呢個用瓦煲仔上，份量多到嚇一跳。同一般食開藥材味較濃嘅肉骨茶唔同，呢個主要係白胡椒味嘅湯底，唔係我鍾意嘅口味，所以我只係食咗兩塊肉排，都算幾腍幾入味，唔錯；其餘絕大部份係豬手，對面位話好食，好多骨膠原喎😆。飲品則有驚喜，雙檸桔子蜜茶清新解渴，蜜味香甜，茶味夠濃，雙檸桔仔醒神開胃，好飲👍。