微酵烘焙 (MOKO新世紀廣場) (Closed)

近排天氣反常，搞到好多PROJECT都要延期仲要OT。作為打工仔真係千般不願，好彩老細識做肯請食下午茶。梗係出去行下輕鬆下啦。HEA完見呢度做緊新包PROMO就試下野。呢度好有內地知名飲品店嘅風格。麵包款式都多，所以一人一人件拎返去邊食邊做。大熱髒髒包都有三款味道，但啱啱先食完唯有留返下次。哈哈。亦有唔同款式嘅包點，任君選擇。芝士金磚。好鬆軟亦都有好香嘅芝士咸香味，最好都係跟返背面指示加熱，就可以試到新鮮出爐嘅麵包口感。肉鬆包超級大個，面頭嘅紫菜肉鬆經過加熱後更香酥，配上好似沙律醬嘅味道，咸酸甜咁幾好食。章魚造型嘅麵包都好趣緻。不過就驚太飽，揀咗隔離嘅麻薯蘑菇。麵包入面包住咗個芝麻餡麻薯，入口煙韌又有芝麻香。細細個食完都覺得十分飽肚。哈哈。見到有奶茶，又點會放過老細柯打咗兩杯黎飲，台茶18號紅玉，紅玉因為有芝士奶蓋所以入口味道甜帶茶香。而極濃日式抺茶因為店員搞錯咗，整錯咗做法式可可，哈哈。免得佢重做就叫佢唔使再整了，可可飲落夠濃啱啱我地嘅朱古力控。兩杯都揀咗半糖及少冰味道啱啱好。