囍雲天酒家 (Closed)

觀塘新商貿大廈愈來愈多，比舊式工廠大廈靚仔得多，地方乾淨企理。平時在觀塘飲茶，多數幫襯近地鐵站附近幾間中式酒樓。今日行遠幾步，在偉業街宏利金融中心囍雲天酒家飲茶，感覺印象良好。囍雲天酒家在宏利金融中心1樓，裝飾華麗，地方寬敞，環境舒適。囍雲天行中菜路線，有多款菜色選擇，傳統粵菜、點心、燒味、燉湯和海鮮等，應有盡有。坐下叫了卜卜脆燒南仔、懷舊馬拉糕、孖寶瑤柱蛋白炒飯配灼田園油菜、聽說這裡鮮蝦菜苗餃和蛋白杏仁茶都出色，順道試試。 卜卜脆燒南仔，外皮燒得金黃香脆，肉身肥瘦適中而不肥膩，肉香滿溢好味。鮮蝦菜苗餃，餃皮夠薄而通透，蝦肉菜苗清晰可見，蝦肉爽口彈牙，菜苗嫩綠新鮮，賣相吸引，味道可口，值得一讚。馬拉糕深褐色，足證發酵夠，味道有層次，即叫即蒸，蓬鬆，柔軟，包香撲鼻。至於孖寶瑤柱蛋白炒飯配灼田園油菜，飯粒夠乾身，略帶油脂，加上瑤柱蛋白蔥花兜亂猛炒，熱香好味。跟配田園菜心，亦翠綠新鮮。飯後來個蛋白杏仁茶，蛋白香滑，杏仁味非常濃郁，入口清甜滋潤。 囍雲天整體食品水準不錯，環境舒適，是飲茶聚腳好地方。