明乾小館 (Under Renovation)

今日舊同事收工早，話係佢公司附近新開既＂明乾小館＂菜式幾岩口味，點心又靚又好食，約我去個度飲茶。入到去環境真的唔錯，坐位寬闊，點心亦好有特色。嗌幾碟係外面比較少見黎食😋先有彩虹蝦餃，色彩繽紛奪目，賣相美不可言，餃皮晶瑩剔透，蝦仁彈牙。黑松露小籠包真係做到皮薄餡靚又多汁，食出濃郁嘅黑松露味，點埋醋更加係最佳配搭。黑蒜燒賣出面少見，別具特色，蒜味頗香，肉質爽嫩！而帶子紅米腸更加有金箔，食落細膩爽滑，滿口鮮味，帶子有口感，可說是一試難忘。炸物方面有蘿蔔絲酥餅，炸得香脆唔鬆散，裏面嘅蘿蔔蓉非常之香甜，而鮑魚酥同樣出色，酥脆嘅外皮滿有牛油香，咬出層次，鮑魚一口size，香香甜甜。