黃金冰室 (北河街) (Closed)

武漢肺炎改變咗好多人嘅飲食習慣，有啲人技能解鎖，搖身一變成為廚神；有啲人變咗格價專家，各大超市網店食品價格瞭如指掌；我呢？可能就係以後同陌生人搭枱嘅時候都多咗份戒心😆。話說今日午飯時間去咗黃金冰室，因為人多，需要同其他食客搭枱，坐喺我對面係個大叔，由於張枱比較細，當大叔用口吹佢個熱辣辣嘅鹹魚雞粒飯時，我正埋頭食緊嘢，於是就聞到應一應🥵。到我食完嘢飲最後一啖熱檸茶時，大叔忽然咳咗一下，咳聲帶痰😵，嚇到我心離一離，即刻閉氣抹嘴戴口罩起身埋單走人。好啦，講返食物，今日本來想叫午餐，但見到隔離枱個飯勁大碟，我肯定食唔哂，無謂浪費，於是就叫咗個常餐。我揀咗沙嗲牛肉拼仿鮑魚絲即食麵同吉列豬扒，呢度嘅沙爹醬好濃，比較甜，幾好食，牛肉雖然鬆肉粉落得比較多，但係都算有牛味，唔錯，仿鮑魚絲份量就少咗啲啦😂。至於塊吉列豬扒其實並唔吉列，只係普通炸豬扒，不過都炸得幾香口，鬆肉粉令到肉質偏腍，好易入口。隨餐附送嘅多士則充滿牛油香氣，好好食😋。