薈亞廚房 (Closed)

今日黎到將軍澳薈亞廚房食Lunch，餐廳真有品味播住謝霆鋒嘅歌，一邊食一邊聽特別開胃， 午市叫左二人餐， 再加小食，我地將所有嘢食清曬，好飽飽。二人餐有串燒、酸辣鳳爪、四季豆、粉絲肥牛煲、白飯/油飯同龍眼冰，認真豐富。頭盤沙嗲串燒配泰式酸辣鳳爪，串燒揀左雞肉，雞肉嫩，沙爹醬好味。泰式酸辣鳳爪，酸辣度啱啱好，好醒胃。而個香葉辣椒膏炒四季豆，少少辣有d似馬拉盞，惹味得來， 口感層次比一般炒菜更豐富，用嚟送飯一流。馬來沙爹粉絲肥牛煲，有勁多索哂汁既粉，個煲仲有青椒，黃椒，紅椒同菠蘿，加埋肥牛一齊食絕不單調。我地仲加左個小食，芋絲網皮春卷，外脆包住入面既芋泥，芋香十足。