餃子縣餃子專門店 (Closed)

每隔一段日子，總會有一舖餃子癮起，今日黎開旺角，原本諗住去某小食店買滷味食，係途中發現呢間餃子舖，條癮又起喇。今日叫咗我最喜歡嘅香菇粟米餃，餃子皮薄，內裡餡料充足，豬肉餡夠多汁，配埋鮮甜嘅粟米，都幾好味。略嫌失望嘅係湯底，只係普通嘅清湯，如果可以花多少少心思落個湯底度會更好。酸辣粉味道唔錯，配料只有簡單嘅肉碎及花生，薯粉吸收晒酸辣湯底後好惹味，但個人認為唔夠辣，可以再辣少少。另外叫咗一份雞絲粉皮，面頭鋪滿青瓜絲，麻醬略嫌太淡，唔夠芝麻香味，相比起其他餐廳嘅雞絲粉皮，呢度嘅味道唔太足夠。