香滑咖喱屋 (Closed)

Lunch 有嘢搞, 被迫甩靚女朋友們底 , 搞完只好自己搵地方快快搞掂. 是日飯癮極大, 無懼「飯氣攻心」, 嚟到呢間港式咖喱店試試. 一個人來到好快「攝」到位, 叫了「小辣」「特式咖喱羊肉」(單點 $40) 配白飯 (亦可配薄餅), 9 秒 9 就有得食 先空口呷啖咖喱汁, 果然小辣, 我覺得稍鹹, 濃度一般, 不過都幾香; 羊較瘦, 肉幾腍, 黐住筋膜位的當然較好食, 羊味整體就一般; 薯仔反而仲好食, 軟腍粉粉的又沾滿咖喱汁, 幾喜歡, 可惜得嗰兩舊啦; 白飯較削, 碟頭亦比預期細, 不過撈上咖喱汁, 都可以吧. 由於愈食愈辣, 食到最後個口都有點「慶」, 早知加 $7 跟杯飲品啦. 環境係茶記格局, 光猛乾淨, 人多但唔擠迫; 招呼就又快又準, 伙計阿叔禮貌亦不錯, lunch hour 算係咁了.$40 埋單, 可以一試的, 不過如果你好似我咁硬頸, 偏愛濃度及層次感更高的印度咖喱, 呢個咖喱羊就未必好啱你了.