baby café (Closed)

今日晚餐真心唔錯! 小弟第一次嚟到，晌唔知點D咩好嘅情況下，見到餐牌有唔少baby推介食物，心想推介嘅應該唔太差啦! 就點咗幾款食物試試。全間餐廳設計都以baby為主，連Menu都有佢嘅樣，好精緻。熱帶水果冰紅茶味道同檸檬茶差不多，加咗橙、菠蘿、荔枝等水果，唔太甜，飲落好冰涼，最啱家下D咁熱嘅時間飲。卡邦尼椰菜米粉雞卷，一界開舊椰菜卷，入面就係米粉，食落有D中菜Feel嘅味道，不過個汁就的確唔錯，好濃郁芝士味。拔絲雞翼有4隻，肉質好嫩，雞翼都沾上麥芽，有少少痴牙，甜甜地幾好食。菠蘿燒汁西班牙黑豚扒配紫薯賣相唔錯，黑豚扒好大份，肉又唔韌，其實塊豬扒已醃過，唔加旁邊D燒汁都夠味，而燒菠蘿好甜，一D都唔酸。要推介係個紫薯，簡直頂瓜瓜，超滑口，又夠濃紫薯味，可以話係入口即溶。打開餐牌個陣，已見到烤大菇蟹肉意大利飯好似幾吸引，嚟到時真係唔錯。上層勁多蟹肉汁，配合燒得剛剛好嘅烤大菇，味道好夾。Risotto 有少少煙韌，味道亦好Creamy又唔膩。