Lucky Ristorante (Closed)

今日朋友帶我嚟旺角上海街呢個活化嘅618商場，原來而家裝修得咁靚又多特色餐廳，我哋就揀咗其中呢一間Lucky Ristorante食個悠閒嘅lunch。餐廳嘅假天花吊滿咗一串串嘅乾花，所以未入餐廳已經俾佢嘅香氣吸引住。午市套餐價錢都唔貴。下次晏啲嚟仲可以試吓呢個下午茶小食餐牌。跟餐可以選擇湯或者沙律，是日餐湯粟米湯係用新鮮粟米打成，仍然保留部份粟米蓉，令口感更豐富。沙律除咗有沙律菜之外，仲有柚子、粟米同車厘茄，味道份外清新。全日早餐All the Breakfast嘅賣相都幾吸引，有齊腸仔、炒蛋、沙律菜、煙肉、薯餅、蕃茄、茄汁豆、多士同大啡菇。薯餅係紫薯薯餅，特別得嚟又好食。炒蛋炒得又香又嫩滑，放喺蒜蓉牛油多士上面份外好味。另外我哋想食牛扒，所以就揀咗紐西蘭頂級肉眼香草燒汁，薯菜係意大利黃瓜同薯條。雖然係肉眼扒，但係肉質勁度十足，非常有口感。最後我哋都不約而同揀咗mocha。雖然如此，但兩杯咖啡嘅拉花都唔同，睇得出店員甚有心思。