錦麗 (世貿中心) (Closed)

我自己本身係一個好鍾意食粉麵嘅人，係我嘅心目中香港最好食嘅粉面就係南記！但係全世界最好食嘅粉面，就一定係越南胡志明市嘅pho le (錦麗）！到而家我都仲係好記得年幾前去越南食嘅嗰個味道！其實較早前就知道喺香港開左分店，但係後來知道原來係大財團附屬嘅牌子之後個興趣就低左啦。最近有行銅記所以就試吓啦！其實裏便環境都幾迫，啲枱都好細張，當你叫咗碗粉同埋兩樣小食之後其實已經無位，都加上佢成日都好長人龍，所以你都唔好期望坐到好耐。講下個重點先！今次我哋嗌左綜合粉，熟牛肉粉，大蝦扎肉紙米卷，炸蝦餅，凍越南咖啡同鹹檸檬梳打。粉面嘅質素係唔錯嘅，同越南比當然係輸晒啦，但係我覺得個湯底唔錯既，起碼我食到蔬菜烤過既味道，反而骨頭嘅味道就唔係好多，屬於一個比較清嘅湯頭。生牛肉片不過不失，熟牛肉嘅味道反而似潮州清湯腩，反而牛丸係最有驚喜，一咬落去牛味重，係推介既！飲品類就不過不失啦，反而啲小食就真係麻麻地，完全可以唔使叫，我覺得有小小伏囉！我覺得如果想食清淡野淨係食碗河粉係唔錯嘅，價錢又唔係好貴，不過其他嘢可以唔使叫，慳返啲錢食甜品仲好！