函館元祖北海道拉麵

Open Now

Now Closed

經友人嘅介紹，是晚去到太古坊做一個消費調查，當然有報酬啦！阿K都响太古坊番工，所以我叫佢等埋我一齊去食晚飯。既然咁近城隍廟，我緊係唔會錯過機會，去「函館」試一試久聞嘅拉麵。未入座，我們已經擬定好我地想食嘅嘢。我叫咗一碗豬骨湯拉麵，阿K就情鍾鹽味湯底嘅拉麵，再加一客炸蠔。遺憾本人從未去過日本，未試過當地正宗湯拉麵。不過試過豬骨湯同埋鹽味湯之後，終於明白點解阿K揀後者。咁樣講唔係話呢度嘅豬骨湯唔好飲，而係鹽味湯實在太出色。咸味中帶一點清幽，絕對與坊間經常食到嘅差天共地。相比之下，煮豬骨湯嘅難度冇咁高了。拉麵水準一流，十分彈牙，絕對係滿分之作。配料係簡單嘅幾片叉燒、海帶、筍、蔥等。據阿K所講，千祈唔好睇少呢啲蔥，係貴價嘢，响香港唔係咁容易買得到。炸蠔落炸粉份量恰如其分，薄薄嘅一層炸漿，炸成金黃色，香脆得嚟唔會肥膩，裡面嘅蠔亦唔會炸至乾癟，既能保存鮮味，亦十分多蠔肉汁。食飽飽，喫一口清茶，連一杯少少嘅茶都唔馬虎，有清清的一股茶香，為一頓美味嘅晚餐畫上一個完美嘅句號。是次人均消費八十蚊左右，十分抵食。