敏華冰廳 (V Walk)

Open Now

Now Closed

呢幾年因為成日都要出Trip , 所以多咗食國外唔同嘅美食，但講到每次離開香港最令我懷念嘅，始終都係微小但卻偉大嘅香港本土食物。沙嗲牛麵、厚多士同熱奶茶呢個組合，絕對係幾十年嚟不變嘅黃金搭配。作為香港人，無論食幾多次都唔會厭，因為冰室同茶記嘢食，係屬於我哋嘅集體回憶。講番呢間敏華冰廳先，由之前佢仲叫“文華冰室”嗰陣，我已經係忠實fans，就算改咗名又開咗咁多間分店，食物質素依然保持一貫嘅高水準，沙嗲牛麵香濃入味、牛肉新鮮嫩滑，厚多士烘得啱啱好、香脆可口，而多士表面淨低嘅餘溫，就令冰凍嘅牛油融化得恰到好處，令幼滑柔和嘅牛油觸感喺厚多士表面得到一種默契級嘅配合同提升，喺脆同軟、熱同冷之間，我已經被感動到無法言語。最後，唔可以唔提佢杯奶茶。茶香飽滿、奶味細滑、一口入魂、百轉千回。一路都覺得港式奶茶就係香港嘅文化符號，奶茶用料雖然簡單，都不過係紅茶同淡奶，而口感上醇厚絲滑的奧妙，就在於撞茶呢道工序。撞茶，講到底就係茶同水嘅撞擊，至於要撞擊幾多次先可以得到最順滑嘅質地，就有賴經驗豐富嘅師傅喇，而呢種唔怕苦、唔怕錯嘅精神，正正就係香港人最可貴嘅精彩財富。香港加油，香港人加油。