神虎拉麵 (Closed)

即食即分享，灣仔其實有好多好野食，琴晚就試咗呢間神虎拉麵（因為見門口都有幾多人排緊隊）。老實講，真係好耐冇食過啲咁好味嘅日本拉麵喇！識食拉麵嘅，一定係食個湯。因為麵嘅粗幼、軟硬，喺一般嘅拉麵店都有得揀架喇，所以湯就變咗成碗麵最重要嘅一環！而喺香港食嘅拉麵入面，佢地嘅湯通常都係勁濃味，濃到食唔到其他野嘅味（包括餸、蛋同埋麵嘅味），仲要好多時會因為落得太多味精，而要狂飲水，食完又會覺得好膩好濟但好老實，呢間嘅湯竟然係唔覺得油膩，仲有幾香嘅豬骨味。拿…留意返，唔係好濃、亦都唔係好淡嘅豬骨味，而係適中！食完都唔會好口渴，呢個我叫咗硬身嘅幼麵條，好有咬口，正啊！！呢個大大碗嘅招牌拉麵就可以食得好飽肚，double咗個叉燒，有紫菜食，咩配料都有齊，佢嘅湯咪都好香，但我個人比較「重口味」，所以白虎濃少少味，我個人鐘意啲。（謹記每款拉麵都加返香油，因為真係好味同埋香好多。）另外叫嘅呢個餃子，都好正！煎得好香，個皮仲有少少脆，入面包住啲肉汁，熱辣辣食完真係好滿足❤️兩個人食2百零蚊，其實就同正常拉麵店差唔多價，但呢間質素真係幾高。不過衰就衰在佢早閂門（好似9點？）搞到我地都趕住走，不過都值得過海食下佢嘅！