Uncle Pizza, Pasta & Grill (Closed)

朋友介紹呢度有間很細嘅Pizza好出色，趁今日放假，就約埋一大班朋友嚟試啦。點知今日打風，好多朋友都放左飛機，就最後同朋友兩個人去食。不過佢係一個唔食pizza嘅人，咁今日就冇緣試pizza啦。我哋就諗住今日試小食同啤酒，下次再一大班人黎試pizza。估唔到呢度嘅小食都好出色，我自己最鍾意呢個黑松露薯條。因為佢除左價錢好平外，佢一上枱就聞到好濃嘅黑松露味，啲薯條都係啱啱炸起，粗幼適中，外脆內嫩。完全唔使點茄汁都好好食，而且佢嘅炸粉唔係好重，食落一啲都唔會熱氣呀。而我朋友就覺得呢個蜜糖雞翼最好食，佢嘅雞翼好大隻，而且雞肉好嫩滑，送酒一流啊。佢嘅外皮整到好香脆，而且唔會太濃味，越食越開胃。而且呢度有happy hour，八點前嚟飲酒非常平。而且佢仲有好多唔同種類嘅啤酒，我自己就認為呢個德國啤酒最好飲啦。呢間餐廳雖然唔大，但係佢嘅位置坐得好舒服，好啱一大班朋友坐低傾偈飲酒。下次我哋都一定要再約多啲朋友嚟試吓佢嘅Pizza呀！