Spring field (Closed)

以前係墨爾本既時候已經鍾情食越南河粉，果一種濃香而清甜嘅牛肉湯底令我成日都懷念。返到香港後一直搵唔番嗰一種味道，難得去開灣仔，知道有一間都幾多好評嘅越南餐廳，二話不說去試咗個午餐，睇吓水準如何。可能由於疫情嘅關係，本身細小嘅店舖因為社交距離嘅關係而移開左啲枱櫈，令到個空間都幾迫。呢間鋪主打澳洲和牛既越南河粉，今次試咗個澳洲牛丸牛肉雙拼河粉，另外再叫咗個牛油雞翼。值得一提嘅係，枱面上有一張漫畫黎教你如何食越南河粉，都幾貼心有趣。首先黎到試左個湯底，清甜得黎有好濃既和牛香以及香料味，陣係飲個湯已經知道黎個粉唔簡單。最有驚喜係個牛丸，非常彈牙同埋好有牛油脂既香，同坊間一般食到既牛丸好大分別。半生熟和牛都幾嫩滑，牛肉味都唔差。牛油雞翼都唔錯，外皮脆口，味道亦唔會太咸，配上自家制既魚露醬甜甜地，食落都幾夾。