Niku Niku (Closed)

近年香港新開嘅日式燒肉店越來越多，有本土派、亦有日本過江龍，主打當然係日本或澳洲直送的和牛，某啲集團式嘅燒肉店更推出燒肉放題，用好優惠嘅價錢就可以任食和牛、黑豚肉等等。我本身都中意食燒肉，而眾多嘅燒肉店當中，我就最中意位於大坑嘅Niku Niku。Niku，日語「肉」，所以餐廳以肉食為主打。餐廳用咗日本A5和牛，和牛更達刺身級別。除咗和牛，餐廳亦有提供豬、雞同海鮮。齋食肉又好似唔係咁健康，所以先嚟一份沙律。我就揀咗大根沙律，特別在出面比較少見只係大根、即係白蘿蔔做主角嘅沙律。白蘿蔔切成幼絲，配上少少甘荀絲同洋蔥絲，再加上沙律醬汁，味道清新宜人。生嘅牛肉個人就唔太好，但喺店員嘅介紹下，都叫咗一份佢哋嘅招牌菜之一：肉うに。海膽好鮮甜，配上和牛真係好夾。而且賣相精美，都真係無得輸。燒肉方面，我點咗特選和牛3部位燒肉拼盤。依個拼盤分別有西冷薄切、牛小排同埋牛柳中部。店長話牛肉本身係刺身級A5和牛，所以唔好燒太耐，燒到三至五成熟就最好食。既然店長咁講，當然就好聽話咁跟住嚟燒啦，牛肉都係兩面燒一燒，見到變色就夾起喇。果然，不論係西冷、牛小排、又或者係牛柳，每款牛肉油脂分布均勻，入口帶滿油香而唔膩。