緬甸招牌湯米線 (Closed)

喺何文田培正小學附近有一間正宗緬甸餐廳，每次行過見到都有幾多人喺度食緊，今日打算坐低試吓緬甸菜作為周末嘅下午茶。舖面細細但相當清潔，原來食客好多都係熟客仔，見到佢哋同老闆娘不時傾吓計，原來係緬甸華僑開嘅店舖，所以好多老鄉親都嚟幫襯，仲話佢哋啲香料食材好正宗。原來老闆娘會返緬甸直接入一啲食材返嚟香港。今日我哋食咗酥炸黃金脆蝦餅、緬甸風味咖哩雞撈米線，米缐加大只加5元。飲品方面試咗一杯緬甸生薑檸蜜、一個青檸蜜瓜椰果特飲。對於我地未食過緬甸菜嘅人來講，感覺相當唔錯，香料同煮食方法，其實都好容易令中國人接受。喜歡味道濃郁食物的我，緬甸菜確實啱我口味。