Video
Read full review
2017-11-18
1881 views
上星期同幾個好姊妹飯聚，席間有人提到北角最近新開咗間叫「姨婆瑪麗」嘅車仔麵店，據說店子主打馬來西亞菜，除了有車仔麵食、椰香飯和咖喱麵等供應之外，還有不少馬來西亞小食，如沙嗲串燒、娘惹泡菜、烏打烏打等可作配搭。反正星期五懶懶地，唔想煮飯，就一於下班後去試下。小店位於北角道亞太商業中心，是家地鋪，位置唔算起眼，不過門面就用上落地玻璃。踏進內，地方不大，以木製方桌為主，細心一數，只有約 30 個座位，如果是繁忙時間到訪的話，應該會有點逼狹。不過睇得出店主喺裝潢上花過不少心思，近門口擺放了幾盆散發著淡淡幽香的斑蘭葉，而牆身就懸掛了多幅馬來西亞街邊常見的串燒檔照片，加上有趣嘅店名，玩味十足。拿起餐牌，車仔麵共有三款湯底，有怡保清雞湯、咖喱湯、蝦麵湯，另外亦可以揀撈麵，而配料就有二十四款，由最基本的豬皮、豬紅、蘿蔔，以至比較特別嘅西刀魚蛋、豬軟骨等，全部有齊。至於碟頭飯方面，就以椰香飯為主，同樣可以自選餸料。不過如果唔想傷腦筋的話，店子亦另備有幾款固定配料的麵食和飯餸可供選擇。點了個三餸蝦麵湯底配油麵，而餸料就揀咗蝦、西刀魚蛋同豬軟骨 ($38)。蝦麵湯底據說是以蝦殼、南薑、蝦米等熬煮而成。先將辣
小店位於北角道亞太商業中心，是家地鋪，位置唔算起眼，不過門面就用上落地玻璃。踏進內，地方不大，以木製方桌為主，細心一數，只有約 30 個座位，如果是繁忙時間到訪的話，應該會有點逼狹。不過睇得出店主喺裝潢上花過不少心思，近門口擺放了幾盆散發著淡淡幽香的斑蘭葉，而牆身就懸掛了多幅馬來西亞街邊常見的串燒檔照片，加上有趣嘅店名，玩味十足。
拿起餐牌，車仔麵共有三款湯底，有怡保清雞湯、咖喱湯、蝦麵湯，另外亦可以揀撈麵，而配料就有二十四款，由最基本的豬皮、豬紅、蘿蔔，以至比較特別嘅西刀魚蛋、豬軟骨等，全部有齊。至於碟頭飯方面，就以椰香飯為主，同樣可以自選餸料。不過如果唔想傷腦筋的話，店子亦另備有幾款固定配料的麵食和飯餸可供選擇。
點了個三餸蝦麵湯底配油麵，而餸料就揀咗蝦、西刀魚蛋同豬軟骨 ($38)。蝦麵湯底據說是以蝦殼、南薑、蝦米等熬煮而成。先將辣醬與湯底拌勻，呷一口，質感雖然唔算好濃稠，但入口辛香微辣，帶一股清鮮的海鮮味。再挾起油麵入口，粗韌彈牙；海蝦肉質爽實，而西刀魚蛋亦微甜滑溜，加埋軟腍入味的豬軟骨，味道不俗，唯一就是稍嫌湯底有點油膩。
食完麵就一於揀個椰香飯試試，不過今次唔想再動腦，點了一客已預設餸料嘅辣死你姨媽 ($62)，材料除咗主角椰香飯外，還配有雞蛋、花生、鯷魚、青瓜、娘惹泡菜、冷當牛腩和大大隻怡保炸雞脾，實在超級豐富。飯用上普通泰國絲苗米，不過就加咗泰國椰汁去煮，所以食落有淡淡椰香，但又唔會好膩口。配料方面，最愛就是娘惹泡菜，味道帶點酸甜，非常開胃。另外冷當牛腩，水準亦不俗，不但鬆化腍滑，而且入味鹹香；還有香口嘅怡保炸雞脾，雖然肉汁不多，但炸得色澤金黃，雞皮脆口又不覺油膩。
見餐牌上有唔少特色小食和沙嗲串燒，反正一場嚟到，就點客沙嗲豬牛雞串燒 ($44) 和馬來燒菜心 ($28) 一試。各款串燒都帶點炭火香，肉質不俗，尤其是雞肉和牛肉，前者肉質嫩滑；而後者咬下不韌、帶著肉汁，配上香濃的沙嗲汁，十分惹味。馬來燒菜心亦屬水準之作，翠綠菜心燒得表層微焦，入口腍甜多汁，非常好吃。
飲品選擇不多，有汽水、檳城白咖啡、自家凍特飲 ($14) 和鮮豆漿 ($12)。自家特飲冬瓜龍眼茶，入口清甜滋潤，比汽水更加解渴，如果入面可以加埋冬瓜蓉，口感應該會更正，而鮮豆漿就順滑無渣，豆味濃郁。兩個人吃得飽飽，每人唔使一百蚊，價錢不貴，下次會再嚟試吓咖喱麵同雞飯。
Post
