馬來椰爺 (Closed)

呢間好hit嘅小店最近喺長沙灣開咗分店，主打多款以新鮮食材同天然香料製作嘅叻沙摻摻，湯底濃味但絕對無落味精，健康又好味，難怪大受歡迎啦！雖然地方唔算好近，但價錢夠親民化，而且店員十分友善，值得到訪😎見呢款香料娘惹喇沙湯底係招牌必食廚師推薦，果然無介紹錯，辣度有成三級，以多種天然香料、鮮炒手工叻沙同椰奶混合而成，更加入自家炒製手工醬，味道層次感豐富，香辣惹味～ 另一款係香草椰奶湯，散發著淡淡嘅香草香氣，椰奶味突出，個人十分喜歡，建議先試湯底，再決定要撈勻定係當沾麵咁配椰奶！兩款配料都有蜆肉、深海魚蛋、芽菜、豆卜同青瓜絲，掺摻好掛汁，但份量唔多，男仔未必夠飽🤔主食要咗炸軟殼蟹，原隻上，大大隻，炸至外脆，啖啖肉，值得一提嘅係廚師堅持去除蟹腮同蟹腸，令客人可好安心咁食，十分貼心～ 虎蝦有兩隻，爽口彈牙而且竟然有膏，有驚喜😂 私心推介呢度嘅手工咖央多士，自家鮮製，要咗鮮香蕉流心班蘭椰香口味，兩者唔會蓋過對方，好甜好好味😋 馬來炸香蕉都唔錯，小朋友之愛，一個人可以清曬～ 飲品有芒果椰香鮮奶，真材實料，一滴水都無落，香濃幼滑，性價比高😍