CJ Cafe (Closed)

住馬鞍山咁耐，難得放假可以行下，竟然發現泳池隔離有間幾靚既餐廳，就不如去試下啦！ 餐廳有相當既空間感，席與席之間都有啲距離，加上一排大既落地玻璃窗，諗諗下 情人節同女朋友黎慶祝都幾好喎！泰式酸辣鳳爪 78份量都算幾多，而且食落無乜骨，小小酸辣，帶一點港式口味，係咸左啲啲，食得出好濃既魚露味，同埋用左好多新鮮菜拌碟，做出泰式既清新感。餐湯（雜菜湯）雖然餐湯係跟餐既，無需加錢，但係水準好好！ 一來好多料，啖啖都係菜，岩晒我呢啲渣怪😂 黑松露扒帶子意粉 78嘆緊餐湯既時間，我點既黑松露扒帶子意粉送到，聞到陣陣黑松露味，食落口，真係好香好濃，亦唔會感到膩，反而帶子就咸左小小，但整體都係水準級呀！餐廳提供選擇既特飲都好特別，天氣咁乾燥，點了一杯蘋果杞子茶，好重蘋果味之餘又唔太甜好解渴！特多杞子！食過咁多間cafe,CJ真係值得推介，由環境，味道，到價錢都好好，至少會食得出「心機」呢樣野！以後又多個好既選擇喇！