梨巴王子甜品棧 (Closed)

喺馬鞍山住左多年，可以話你知甜品店唔多選擇，講到會多去既店應該係梨巴王子啦！我覺得佢地既甜品喺馬鞍山區黎講比較用心，算係幾好架啦！呢晚同朋友一齊黎叫左最普通既芒果布丁，哈哈...成隻獅子咁笑嘻嘻，好得意啊！芒果味濃度算中上，布丁質地滑dodo，多d花奶岩哂我，而且唔會太甜，幾正吖。呢個好似叫鮮果三色船，下面有3球雪糕(草莓，雲尼拿，朱古力)，上面佈滿鮮果，加上芒果汁，同埋西米粒粒，天氣熱食呢個透心涼，最愛佢多鮮果，感覺上健康d (笑)。燉鮮奶就好普通啦！如果熱食可能好d，凍食唔夠滑，奶味唔出，不過都係同一優點就係唔太甜。最後就係傳統既渣渣啦！講真，渣渣唔係周圍都整得好味架，呢到煲得好林，起哂沙架，料仲好足添，我覺得渣渣熱食好味d。