富臨薈 (Closed)

嗰日同朋友去沙田行街，行到晚飯時段大家都想食中菜，咁就去咗富臨薈啦！坐低左之後見到枱面有個好特別嘅餐牌，係講緊聖誕大餐嘅，咁我哋就問吓侍應現在有冇得叫嚟食啦，話叫得咁所以我哋就order個聖誕大餐啦！第一道菜就係紅米賽螃蟹餃，個賣相好靚，個紅色嘅皮真係好醒神，食落味都唔錯，而且都大隻嘅第二道菜就係聖誕馴鹿包，個樣真係好得意，食落甜甜地都唔錯。之後嚟咗兩杯聖誕沙冰，顏色好鮮艷紅卜卜咁，飲落有香蕉味但係其他味我又唔係咁分得出，但係都OK好飲嘅。再嚟就係有個冰鎮鮑魚聖誕樹，呢一個就好驚喜啦，因為個聖誕樹真係好靚，啲西蘭花加埋啲紅椒黃椒同埋少少椰絲上邊仲放左啲鮑魚，完全係一棵聖誕樹咁。咁之後就開始上主菜啦，有個海皇龍蝦扁意粉，個扁意粉真係好好食嘅，個汁係龍蝦汁，撈落啲意粉度加埋龍蝦肉，簡直係perfect ！咁聖誕大餐梗係唔少得有雞啦，聖誕餐有原隻嘅聖誕燒春雞，而且隻雞都幾大隻嘅，原隻比你自己食，可以用絞剪剪開又得，自己鍾意撕開嚟食都得，而且隻雞熱辣辣味道係唔錯嘅！最後甜品有映雪白切糕，雖然我其實唔多知佢係乜嘢，但係食落去煙煙韌韌，又唔會太甜，係幾好食嘅！