四寶食堂 (Moved) New Location

其實我已經知道樓下開咗間新餐廳好耐，不過就係次次都唔記得要幫趁，講真，佢又唔起眼，門口又冇餐牌，都唔知原來係一間茶餐廳。咁啱今日陪公主開學，呃咗公司半日假，可以同老公去嘆吓早餐，終於記得去試吓佢～～入到去，裝修的確同平時嘅茶餐廳唔同，如果唔係啲鄰居同我講係茶餐廳，我都睇唔出佢係茶餐廳，舖仔細細，話坐得舒服就呃你啫，不過氣氛就幾好，店員又客客氣氣，輕輕鬆鬆咁，唔會話有種食完要趕住走嘅感覺，呢樣嘢，佢哋做得幾好！（可能因為冇乜生意）食物款式都算多選擇，一般大路嘅茶餐廳嘢囉，火腿通，沙嗲牛肉麵，ABCDE~~餐佢都有，見到佢個餐牌，叫做有個「泰式肉碎米粉」幾特別，就點咗呢個，老公話見到一個「異像」，好多人都有叫沙嗲牛肉麵，佢話叫呢個實唔會出事⋯⋯😂過咗一陣，好快有嘢食，沙嗲牛肉麵果然不負所望，佢同其他茶餐廳真係唔同，好濃好惹味，有啲花生粒，有啲黑椒粒，真係幾好泰式肉碎米呢⋯⋯佢用咗個船河湯底做，普通茶餐廳嚟講，都算好認真。總括嚟講，呢間餐廳仔都算係咁，氣氛坐得舒服，食物有心機，招呼都okay。