泰聚 (Moved) New Location

今晚放工約左朋友過去花墟買花，買完之後就諗住喺附近搵食，行行下近佢屋企樓下有間泰國菜，佢話試過下午茶未試過夜晚，唔想再行黎行去嘅我就決定入去試下佢喇！可能六點半時間尚早無乜人，感覺好寬闊環境唔錯！睇返餐牌都幾多選擇，主菜我哋叫咗鹽燒活鮮魚(烏頭)、泰式炒雜菜、金柚子蝦球沙律飲品方面叫咗原隻菠蘿沙冰同火龍果沙冰，只能夠說兩杯都好fresh，好真實有菠蘿同火龍果嘅香味，清甜嘅感覺！唔似有啲地方用糖水做出嚟好甜好假咁！值得試吓！金柚子蝦球沙律上枱已經覺得好靚，因為用咗整個柚子當碗咁，好可愛！隻蝦好爽好新鮮，味道好清甜，用咗個甜甜哋嘅汁撈埋一齊食，好味到停唔到口！泰式炒雜菜一啲都唔油，菜種類好多，又有菇相伴，廚師亦炒得非常爽口！鹽燒活鮮魚(烏頭)用左鹽燒方法就唔會浪費咗新鮮魚嘅原汁原味，好滑好鮮，時間燒得恰到好處，配埋佢個秘製酸辣汁都不錯！但我個人都係比較喜歡原本嘅味道！朋友想食埋甜品，唔想出去搵就喺度叫埋！叫咗個椰汁西米榚，好有椰奶味道，唔太甜！整體唔錯，服務態度亦都好好，今次兩個人試得唔多款式，同朋友已講好下次嚟試埋明爐鮮魚同咖喱卡農包~