富寶會所私房菜

Open Now

Now Closed

我今日嘅身份係一個好女婿。😊話說我外母一向熱情好客，又愛四方城，適逢佢好友兼雀友生日，佢哋想大搞，外母又認頭做搞手，早已命令我搵好地方，我上網搵到後，佢重要我親身嚟同佢試下睇下，為朋友，親力親為嘅老人家。👍🏻我一入去呢間店，地方相當寬敞，裝修乾淨企理，一張張圓枱，枱同枱之間都唔會太迫嘅，座椅全部有軟墊，坐得舒服。同外母問餐廳預訂詳情，店員詳細解答。餐廳話海鮮最好提前預訂，佢哋提供包場包房服務，又有麻雀檯供娛樂用途，重可以自訂語句展示於餐廳大型屏幕，可以打入生日祝福，啱哂佢老人家心意。一場嚟到，我哋兩個當然食吓嘢，都幾有驚喜。❤️魚肉勝瓜肉丸浸大蜆蜆肉肉厚鮮甜，肉丸大大粒夠彈牙，勝瓜爽脆，不得不提個湯底，魚湯煲到乳白色，鮮甜可口，正～銀魚仔勝瓜海鮮湯飯我本身鍾意食湯飯，今次呢個飯夠足料，海鮮湯底清甜，配埋勝瓜爽脆，銀魚仔又將個海鮮味提升左，食完消暑又滿足。