Chitose (Closed)

今日又去開長沙灣嗰頭，上網見到有一間新餐廳，價錢又唔係貴喎，咁就入去試吓好唔好食。由於我哋兩個人都好肚餓嘅關係，每人叫左一個主菜之後，再叫左三款小食，免加一買單＄300都不用，抵食。芝士汁意粉見每個食過都話好食，就點左吉列魚柳芝士汁意粉$60，魚柳剛炸起夠熱，意粉撈埋個芝士汁一齊食，真係好夾。燒春雞配意粉＄88 ,真係有成半邊雞，雞腿連雞胸份量都不小，雞腿肉夠滑口，有肉汁，意粉汁有少少辣，同外面既有點不同，撈理意粉好夾。招牌泡菜$20，上面灑左紫菜，似日式味道，泡菜辣度剛好，我哋搶着食添。白咖喱青口＄48/4隻，上面有小小洋蔥同蕃茄調味，覺得咖喱汁好入味，配碗白飯一流，青口大大隻，一人兩隻啱啱好。本身諗住係雞軟骨，但係啱啱好賣晒，所以就轉左點炸雞翼，＄32/4隻，炸到好香，而且唔會油膩，但略嫌味道淡左少少。朋友就加左＄32點左芒果熱情果沙冰，勁大杯，飲落去有淡淡熱情果嘅味道，第一次試呢一個組合，係唔錯嘅推介之一。