深宵食堂 (Closed)

岩岩東京返黎，想繼續食日本野，唔想咁快返翻現實，於是上網搵到呢間野食。其實之前早已聽聞深宵食堂既名氣，今日終於有機會去試下。叫左個一口牛串燒，深宵食堂玉子，同埋個鵝肝野菌石頭鍋飯。牛肉串燒得好好味，水份仲保留係肉質度，口感多汁，唔會燒得太老，正！同埋燒汁有陣特別既香味，好食！玉子終於都黎左啦！好大個，仲有深宵兩個字。原來入邊有芝士，入口熱辣辣，芝士味即刻出黎，正！簡簡單單，但味道很好！最鐘意鵝肝野菌飯，野菌飯撈埋鵝肝，鵝肝既味道圍繞住成個飯，飯係珍珠米，鵝肝同飯香加埋一齊原來可以咁夾！冇叫錯呢碗飯！仲有好多野食未叫，不過已經好飽，下次去尖沙嘴再黎試下其他新野！