京林屋 (明宮閣) (Closed)

去住係康怡花園既朋友屋企玩，時間到咁上下要搵地方食飯，朋友就帶左我地黎呢間餐廳，雖然主打係食甜品，但係都有熟食晚餐食。我地決定食完晚餐直落試埋d甜品。主食方面我地叫左一個京式鰻魚飯同埋一個金目鯛定食。鰻魚飯上面有兩塊大大塊既鰻魚，香氣四溢，成陣燒鰻魚味好香。咬落去鰻魚啖啖肉超肥美，個鰻魚汁好濃郁，完全入晒味。而我地比較少食金目鯛，遠睇個魚肉有d似一舊雞翼。魚肉咬落去好軟熟，肉質比銀鱈魚硬少少，不過都係偏軟。食落味道唔多似魚肉，個人覺得反而有d似豬肉，好過癮。仲有一杯野飲叫左焙茶牛奶，之前去日本日日都要飲一杯，呢度既焙茶牛奶茶同奶既比例幾似我之前飲開個隻，好有懷念既感覺，唔會太甜。之後就到主打既甜品，見到佢地有香港限定既芭菲，唔洗諗一定要試，之後再叫左個焙茶芝士蛋糕。香港限定芭菲絕對係份量驚人，可以兩個人share食，最top係抹茶雪糕，托住佢既係抹茶凍加d小丸子，可以撈埋一齊食。成個芭菲有成六七層材料，每一層材料都唔同口感撈埋食有好多變化。最後個焙茶芝士蛋糕芝士味同焙茶味好夾，唔會好膩，可以輕易食曬佢。