燒肉臻 (Closed)

最近好耐都冇食燒肉，所以我就拉咗男朋友一齊同我去食燒肉，見到呢間好似唔錯，就去咗食。入到去，呢度好貼心，因為佢有個櫃桶仔可以俾我哋擺嘢。一坐低店員就問我哋會唔會想飲清酒，因為佢呢度就有90分鐘放題。我哋見部機幾得意，就嗌咗放題飲。我哋一坐低就嗌咗好多嘢食。我哋嗌咗兩串雞尾串、兩串日本味噌五花腩同埋日式魚乾。雞尾串油脂豐富，雞味濃。日式魚乾係我最鍾意食嘅嘢，燒到脆卜卜，食落有甜甜地，好好食。我哋仲嗌咗一碟白鱔、酒盜薯仔沙律、甲羅燒同A4和牛肉眼。白鱔入口彈牙，個沙律亦都非常之清新，甲羅燒超級多蟹膏，再加埋蛋香味，簡直至高享受。牛肉盛合（2人份量）勝在每樣都有啲，油脂分泌平均，而且都好重牛味。活帆立貝好鮮甜，同伊比利亞梅頭超好食，入口即溶咁。炭火雞唔好見佢好似好似肉酸咁，但其實好好食，師傅燒得好好，肉質嫩滑。之後羊腹腩，羊味比較重， 鍾意食羊嘅人就可能好鍾意，但唔係好鍾意食羊嘅朋友仔，可能就唔係好啱食。燒豬腩仔唔會話太肥，師傅亦都燒到個皮脆卜卜，好好食。總括嚟講，啲肉同海鮮都好高質，性價比好高，食到超飽！想食燒肉嘅話可以嚟呢到食！